有咩星座女會見錢眼開？
白羊女
首先要分返故事的先後次序，白羊女會為得到自己想要的愛情而不顧一切去努力，而唔會因為別人的追求而鍾意某個人，所以反而造成白羊女係好鍾於自己的愛情，就算一旦有富商追求佢，佢都未必會為錢銀而心動反而揀返屬於自己的男朋友！
金牛女
如果大家的關係仲係男未婚女未嫁，夢想一向係追求穩定優質生活的金牛女諗法就自然難免會傾向現實，唔駛憂柴憂米喎！當然再加上對方富商情深款款的表白喎…而呢邊的男朋友好似結婚冇期喎…響種種喎加埋之下，金牛女最後會決定接受新歡！
雙子女
雙子女遇上呢種事，令佢動搖的關鍵唔係響富商個「富」字身上，而係新鮮感，同個男朋友拍咁拖，咩愛火都熄晒啦，突然之間出現一個身份咁勁前所未有的追求者，對於對新鮮事物完全冇抵抗力的雙子女…就梗係實心動啦！不過同富商挂到幾耐呢…
巨蟹女
缺乏安全感的巨蟹女響處理感情上都係一切以安全為先，當然啦，富商有咁雄厚的家世或多或少都會增加佢的安全程度，不過對於巨蟹女來講，仲要睇下佢人品點、花唔花心…佢會好認真咁慢慢研究下新歡舊愛邊個好d，當然最後的取決係睇下邊個肯同佢組織家庭先啦！
獅子女
如果你以為獅子女見到有錢佬就見錢眼開拋棄舊愛接受新歡你就大錯特錯，你咪睇平日獅子女大大聲，見到靚仔就雙眼發光就以為佢好花心喎！其實對於愛情佢係好講感覺同責任，直頭講得係有d死心眼，所以就算富商出晒口術兼搵錢引佢，唔過電佢都係會揀返舊愛！
處女女
講到處女女同獅子女都有d相似，不過佢的選擇就更加會出人意表，老實講你話佢唔貪錢就假，不過響佢個字典入面又唔會因為錢而出賣自己，頂多係響富商追佢期間唔多唔少拎返d著數，然後一邊觀察下男朋友的反應，可能最後係揀中富商同男朋友以外的第3人都唔奇！
天秤女
天秤女對於感情處理係屬於好容易動搖的派系，又唔講得佢係花心果隻，如果冇第3者撩佢天秤女都係會好忠於佢的愛情，但係一旦有外來的挑釁，富商日日示愛，個個人猛咁講，一向唔擅長拒絕人再加上生性優柔寡斷的天秤女，面對招招咁勁的富商佢變心只係時間問題！
天蠍女
原則上天蠍女係用情好專一，佢唔會因為有個比自己男朋友更有錢的男人追佢而變卦，佢響感情上都幾死心眼，不過世事又唔係絕對喎！有時天蠍女揀男友的喜好會以錢行先，如果係咁的情況呢，佢就諗都唔駛諗即時畀分手費男朋友，自己就投向新歡的懷抱！
人馬女
性格獨立有自己諗法的人馬女，響感情處理上亦都有d同常人唔同，佢同水瓶女一樣都係唔太按章出牌，不過唔同的係人馬女響處理感情上更加難以估計同反叛，大家越反對佢越鍾意，成日會做出一d出人意表的選擇，你以為佢咁揀咩結果佢揀第二樣，真係估佢唔到！
山羊女
山羊女的選擇就簡單得多，最緊要唔好煩同埋睇下邊個對佢有利，所謂的有利唔一定係講緊要有錢，如果佢覺得富商對佢本身的事業同人生目標冇乜大幫助，反而係佢個舊愛仲可以畀到工作上的支持佢的話，佢會毫不猶豫咁揀舊愛，佢係先揀事業再揀金錢的人！
水瓶女
講到水瓶女佢同人馬女一樣響愛情方面的取態有d難以捉摸，佢異於常人的係鍾意的對象，佢成日梗係將個頭中落果d唔鍾意佢的人身上，人家越係對佢唔瞅唔睬咩，佢就越鍾意，好似富商呢d咁死命支持派呢，響佢心目中自然會扣20分，錢對水瓶女來講絕對唔係一個吸引的項目！
雙魚女
如果大家以為用情似茱莉葉咁專一的雙魚女一定唔會換畫的話…唔好意思，大家估錯晒！要數真係會見錢眼開的星座女，雙魚女一定排響榜首位置！當然雙魚女係真係會用情專一，不過專一都要建立響佢愛你先得，而佢會因為富商勁有錢而深深畀佢吸引住，咪以為佢真係會飲水飽！
